東網電視
更多新聞短片
般費近期罰球頻頻建功。
曼聯喺英超主場1比1打和阿仙奴，隊長般奴費南迪斯表現出色，上半場就係憑佢嘅精彩罰球入波領先。般費上月對愛華頓已入過1次罰球，今仗就令佢成為自2014年嘅朗尼(3球)同桑馬達(2球)，曼聯首個單季射入多過1球罰球嘅球員，而般費對上5季英超加埋只係入過1次罰球。
不過般費今次罰球入波亦「有故講」，當佢主射嗰陣，《天空體育》評述加利尼維利已提出，球證安東尼泰萊指示人牆企得太遠，事後更計算出人牆實際距離11.2碼，比起規定最少10碼「拉遠」1.2碼；下半場阿仙奴亦有一次禁區頂罰球，人牆同樣被「老點」企超過10碼，好在馬田奧迪加特射唔穿。
曼聯中場基斯甸艾歷臣賽後表示：「好開心個人牆好似企遠咗幾米，完美咁幫般費搭好個舞台，佢射門之前我已經留意到。下半場阿仙奴有一個罰球都係咁，我哋當然好嬲球證要我哋企到咁遠。」阿仙奴中場迪格蘭賴斯亦話：「我未睇番入波，感覺上個罰球唔使好高就過到人牆，或者我哋個人牆要做得好啲。」
