東網電視
更多新聞短片
般奴古馬雷斯喺紐卡素舉足輕重。(Getty Images)
周二(11日)凌晨英超，紐卡素作客1比0小勝韋斯咸，打破近期連敗頹勢，喺英聯盃決戰利物浦前注下強心針。紐卡素近期傷兵不斷，領隊艾迪侯域就今場最大成就，就係冇再增添新嘅傷兵。
紐卡素近期接連用利維斯賀爾、保治文兩大守將做手術長抖，安東尼哥頓又要停賽，殘陣嘅「喜鵲」今場仍佔上風，並靠般奴古馬雷斯63分鐘近門射入，以1比0贏波升上第6位，只落後第4嘅車路士2分。
對於即將同利物浦爭逐英聯盃冠軍，領隊艾迪侯域賽後表示：「老實講我只係專注今場，但球員好難唔諗(決賽)，喺決心同鬥志方面，呢場係今季最佳勝利，我哋整體發揮好過對手，贏波係應得。」
阿歷山大伊沙克今場克服傷患掛帥，辛度東拿利同門將尼克普比喺比賽入面亦曾接受治療，艾迪侯域就話：「慶幸今場冇再有新傷兵，雖然有時要等多1、2日，但呢係睇應該冇問題。」
