東網電視
更多新聞短片
居迪斯鍾斯(紅衫)以往曾經3次客串右後衞。(Getty Images)
利物浦上場歐聯16強次回合不敵巴黎聖日耳門，被淘汰出局之外，仲有右後衞阿歷山大阿諾特受傷，無緣周一(17日)凌晨英聯盃決賽對紐卡素，領隊施洛準備出「奇招」，暗示可能搵中場居迪斯鍾斯客串右閘，保持球隊側擊力。
利物浦原本已有2位右後衞祖高美斯、干拿巴特利正在養傷，阿歷山大阿諾特上仗傷出後，施洛派出中堅昆沙暫時頂替其位置，今場對紐卡素前夕，呢位荷蘭名帥有新想法：「阿諾特唔踢得，或者居迪斯鍾斯可以踢右後衞。」
事實上，呢位24歲英格蘭國腳對於司職右閘並唔陌生，佢曾經3次踢呢個位置，包括2023年9月英聯盃對李斯特城。阿歷山大阿諾特以助攻力強見稱，居迪斯鍾斯客串右閘，可以發揮相同功效。居迪斯鍾斯上場歐聯互射12碼宴客，成為出局罪人之一，今場英聯盃決賽正係佢將功補過嘅好機會。
另外，紅軍隊長華基爾雲迪積克表示，仍未就續約問題達成協議，現時只會專注比賽，是否留隊等球季結束再傾。
