東網電視
更多新聞短片
丹般恩13歲時發生罕見意外，失去右手無名指。(Getty Images)
紐卡素中堅丹般恩大器晚成，年屆32歲終於首次入選英格蘭國家隊，呢位童年時候因為發生意外，失去右手無名指嘅鐵衞，用努力彌補缺陷，達成晉身大國腳夢想後，緊接要力爭喺周一(17日)凌晨英聯盃決賽擊敗利物浦，創造「夢幻一周」。
丹般恩曾效力富咸、伯明翰、白禮頓等球隊，甚至去過伊奧維、韋根踢英甲，2022年1月加盟紐卡素，事業先至有平穩發展。呢位身高2米01嘅防線巨人起初最受人注意，卻係佢右手冇咗無名指，原來丹般恩13歲時發生罕見意外，導致切除手指，但並冇打擊佢要成為球員嘅決心，更成為轉捩點，因為手指缺陷，由原本青訓時期擔任門將，改踢後衞，打出一片新天地。
丹般恩今季發揮穩定，吸引英格蘭新帥杜曹注意，55人初選名單已經有佢，周五(14日)公布大軍名單，丹般恩順利入伍，如果佢能夠喺未來2場世界盃外圍賽對阿爾巴尼亞或者拉脫維亞上陣，就可以成為英格蘭近15年最大年齡首次披甲球員，加上有望捧英聯盃，隨時好事成雙。
