東網電視
更多新聞短片
施洛對紐卡素踢法有微言。(Getty Images)
利物浦喺英聯盃決賽大熱倒灶，被紐卡素嘅體力化踢法打爆，被批評拒絕輪換嘅領隊施洛，賽後諷刺紐卡素用粗線條打法，承認喺「高Q大棍」範疇唔及紐卡素。
利物浦上周中踢完歐聯16強，今場決賽體能難免輸蝕，施洛賽後話唔確定係咪體能出事：「呢場波只係大量嘅爭搶，唔講求跑動嘅強度，我判斷唔到球員係咪疲倦，平時會喺逼搶嘅強度上睇到，因為紐卡素只係大腳踢前再去搶，我哋連逼搶機會都冇。」
施洛進一步表示：「如果個波長時間喺天空，同紐卡素踢10次我哋會輸9次，因為佢哋高空波強過我哋，第1同第2個入波都係咁樣出現，喺空戰呢方面紐卡素更強，所以佢哋贏波。」
對於有指利物浦被技術性擊倒，施洛就有唔同睇法：「紐卡素贏到更多爭搶，咁係咪技術性擊倒？呢個係紐卡素最強地方，製造大量高空爭奪並贏出爭搶。不過我心目中嘅擊術性擊倒，係令到對手波都掂唔到、次次都可以突破逼搶去進攻。我要承認，紐卡素喺佢哋嘅風格上係值得贏波。」
