東網電視
更多新聞短片
杜曹首次帶領英格蘭練習。
德國籍領隊杜曹周一(17日)首度主持英格蘭操練，所有入選球員都齊集，包括前1日踢完英聯盃決賽嘅球員。雖然只係第1日工作，但球員已經發覺杜曹嘅練習好唔同。
哈利卡尼、祖迪比寧咸等外流球星準時報到，重返國家隊嘅拉舒福特、佐敦軒達臣，以及「新丁」利維斯史基利、丹般恩等，歸隊後都獲杜曹擁抱同傾偈鼓勵，氣氛良好。
報道指英格蘭以往都係早上練波，不過杜曹就將訓練改喺下晝進行，上午先進行球隊會議同1對1訓練，主要原因係想訓練時間，更貼近嚟緊兩場世盃外嘅開波時間(當地夜晚7點45分)。
英格蘭大軍亦出現人員變動，受傷嘅高爾彭馬由英格蘭軍醫檢查，預計將會退隊，而英格蘭亦已補選諾定咸森林中場基比斯韋特入伍。
