東網電視
更多新聞短片
加歷查囝囝代表馬爾他出賽。
英格蘭名宿加歷查近年做「講波佬」人氣高企，佢嘅囝囝占士加歷查亦打出名堂，效力韋根嘅占士近日入選國家隊，不過就唔係代表老竇踢嘅英格蘭，而係幫馬爾他出戰世盃外，嚟緊有機會大戰羅拔利雲度夫斯基添！
22歲嘅占士同老竇一樣踢中堅，今季喺英甲球會韋根成為主力，23場聯賽有1球進帳，表現獲馬爾他垂青。由於加歷查爸爸有馬爾他血統，加歷查同占士兩父子上個月就獲得馬爾他公民資格，占士亦隨即被選入新一期世盃外名單。
馬爾他今個月將會喺世盃外歐洲區G組，主場對芬蘭同埋作客波蘭，擔任中堅嘅占士有機會大戰波蘭神鋒羅拔利雲度夫斯基。馬爾他足總主席華沙路表示：「我哋同加歷查傾咗幾個月，佢哋對加入馬爾他表示歡迎。我哋會繼續物色可以代表馬爾他嘅球員，其他國家都咁樣做，有咩問題？」
