東網電視
更多新聞短片
迪比利同麥巴比將組成夢幻鋒線。(Getty Images)
法國近年都係靠基利安麥巴比「食胡」，不過奧士文尼迪比利今季大熟大勇，入球數字同麥巴比不相伯仲。據報法國領隊迪甘斯打算效法巴黎聖日耳門(PSG)教練安歷基嘅戰術，務求令迪比利可以喺最佳位置持續交貨之餘，又可以同麥巴比完美融合，組成最恐怖嘅前鋒組合。
麥巴比今季有31個入波、迪比利亦有30球進帳，兩人都係當時得令嘅前鋒殺手，不過正前鋒位置只得1個，法國主帥迪甘斯表示：「迪比利以往踢翼鋒，唔能夠經常保持最高效率，但依家踢前鋒更接近龍門，有更多創造嘅選擇，信心爆棚，表現出極高效率。」
對於迪比利同麥巴比共存，迪甘斯就話：「麥巴比可以踢左翼，但佢更鍾意喺中間享受更多自由度，所有進攻球員都想要自由，所以我嘅排陣亦唔會固定，要增加不可預測性，同將球員安排喺最佳位置。」報道指迪甘斯將安排迪比利擔任「假9」，令左翼麥巴比有更多時間入楔中間，理論上會係個好好嘅配搭。
