東網電視
更多新聞短片
比列錫今場搶鏡過麥巴比。
周五(21日)凌晨歐國聯8強首回合，克羅地亞主場2比0擊敗法國，36歲老將比列錫寶刀未老，今場交出1傳1射，包括一個精彩窩利入波，領隊達歷大讚比列錫同莫迪歷兩大老將係球隊靈魂。
法國有基利安麥巴比回歸，同奧士文尼迪比利合組最「火辣辣」鋒線，不過今場就畀36歲嘅比列錫搶晒風頭，佢26分鐘先傳中安迪布迪美亞頂入，完半場前再右路窩利抽入遠柱死角，助克羅地亞贏2比0。
比列錫喺1年前離開熱刺重返夏德，以為返家鄉等收山，點知今季突然加盟燕豪芬再戰歐聯，今季所有比賽合共錄得10個入波同11次助攻，繼續展示出超強影響力，同39歲嘅莫迪歷一齊撐起球隊。
克羅地亞領隊達歷賽後表示：「比列錫好努力，所以佢一直可以交出最高狀態，呢個入波對佢意義重大，佢喺球會都有好好嘅表現，比列錫同莫迪歷永遠都唔會停止。」
