東網電視
更多新聞短片
巴西今場贏得驚險。(Getty Images)
周五(21日)朝早世盃外南美洲區賽事，巴西喺驚濤駭浪下，靠雲尼斯奧斯祖利亞喺補時9分鐘入波，主場2比1擊敗哥倫比亞，向出線決賽周邁進一大步。
巴西今場9分鐘由雲尼斯奧斯祖利亞博得12碼，拉芬夏比洛尼操刀射入，不過哥倫比亞完半場前由路易斯迪亞斯追平。下半場戰況膠着，去到補時9分鐘，「小雲」嘗試遠射省中敵衞改變方向彈入，為巴西取得2比1勝果。
今場絕殺入波，係雲尼斯奧斯祖利亞今屆世盃外第1個入波，亦係佢喺國家隊9個月來第1球，「小雲」賽後表示：「我哋今場值得贏波，我嘅表現配得上有一個入球，打破入球荒令我可以放鬆一下，好多謝隊友一直幫助，能夠為巴西出賽令我覺得光榮。」
巴西下周三(26日)將會大戰阿根廷，但加比爾馬加希斯同般奴古馬雷斯今場拎到黃牌，要喺下場停賽，或會影響巴西爭勝機會。
