東網電視
更多新聞短片
迪薩比貶格連活特做後備。
格連活特喺曼聯衰咩大家都清楚，今季轉投馬賽重新做人，初時交出好表現，但據報近期再度出現紀律問題，主帥迪薩比冇手軟，就算係隊中首席射手都照貶後備，尚幸格連活特近日態度好轉，總算仲有得救。
重溫格連活特喺曼聯經歷，試過代表英格蘭國家隊期間帶女仔上房違反隊規同防疫令，之後發生家暴女友事件，引起社會迴響，曼聯宣布對佢無限期停賽，雖然後來獲得女友原諒，但英國社會唔肯放過佢，最終被迫離開曼聯。
轉投馬賽嘅格連活特表現出色，26場交出15球3助攻，照道理獲得重用，不過最近兩場法甲對朗斯同巴黎聖日耳門都被貶後備，結果兩場全敗，格連活特失去正選位置亦引起傳媒關注，雖然主帥迪薩比表面回應係球員「不在狀態」，但之後傳出呢位23歲前鋒又衰紀律問題，至於衰邊瓣就冇提及。
國際賽檔期開始，馬賽宣布放假4日，格連活特提早2日返回球會，獨自加操，此態度獲得球會上下認可，認為佢肯改過，復任正選指日可待。
