東網電視
更多新聞短片
巴特利巴高拿今季法甲上陣26場入13球及7次助攻。(Getty Images)
法國上場歐國聯8強首回合作客0比2不敵克羅地亞，鋒線球員腳頭無靈，領隊迪甘斯搵高路梅安尼踢正選，被批評為最失敗用人，次回合好可能收起呢位「敗家仔」，改派大勇嘅巴黎聖日耳門(PSG)新星巴特利巴高拿擔正救亡。
高路梅安尼近年喺PSG長坐冷板，今年1月底被外借去祖雲達斯，雖然首3次上陣入5球，但好快打回原形，近8次為祖記披甲都食白果，加上上場歐國聯又冇波入，陷入長達1個半月入球荒。
網民翻舊帳，指26歲嘅高路梅安尼上屆世界盃決賽錯失入波黃金機會，成為法國失冠罪人，迪甘斯現時仍然重用佢，猶如自廢武功。
事實上，迪甘斯似乎亦知道自己用錯人，上場踢到64分鐘，就用巴特利巴高拿入替高路梅安尼。現年22歲嘅巴高拿今季法甲上陣26場入13球及7次助攻，佢同奧士文尼迪比利合作天衣無縫，成為PSG取得佳績主因，法國次回合能否絕地反勝，巴特利巴高拿將成為關鍵人物。
