東網電視
更多新聞短片
摩頓胡文特攻守兼備。(Getty Images)
曼聯中場基斯甸艾歷臣日前宣布今夏離隊，歐洲各大傳媒爆料，指紅魔鬼已睇中另1位丹麥國腳摩頓胡文特，由佢接替艾歷臣位置，估計曼聯只需斥資4,500萬歐元(約3.8億港元)，就可以將呢位25歲中場硬漢收歸旗下。
效力士砵亭嘅摩頓胡文特屬於曼聯領隊魯賓艾摩廉嘅舊部屬，呢位葡萄牙名帥執教紅魔鬼後，已傳出有意簽入胡文特，隨住艾歷臣決定今夏離隊，曼聯將加快物色中場，準備舊事重提，斟介摩頓胡文特。
事實上，胡文特早已表明有興趣去英超搵食，佢曾經講過：「轉戰英超的確係我嘅目標，可能有1日大家會見到我踢英超比賽。」艾摩廉大讚胡文特擁有雄渾體力，可以全場高速奔跑，曼聯隊內冇呢種球員，可見雙方眉來眼去，希望再次合作。
摩頓胡文特仍有3年合約在身，毀約金為8,000萬歐元(約6.8億港元)，由於士砵亭2年前僅用1,800萬歐元向萊切收購胡文特，估計曼聯只要出到4,500萬轉會費，士砵亭就會放人，胡文特成「魔」機會甚高。
