東網電視
更多新聞短片
迪基亞大踢爭氣波。(Getty Images)
前曼聯門將迪基亞今季以自由身加盟意甲球隊費倫天拿後，表現愈來愈出色，根據意大利傳媒爆料，費倫天拿準備同呢位34歲西班牙鋼門續約1年至2026年6月，並會加1倍人工至200萬歐元(約1,700萬港元)年薪。
迪基亞2023年夏天約滿離開曼聯後，一度超過1年冇波踢，直至上年8月獲費倫天拿簽入，會方當時對佢狀態存疑，僅開出1年合約，年薪只有100萬歐元。迪基亞大踢爭氣波，頻頻作出「神救」，今季上陣29場失32球，並有9場「零封」對手，包括意甲主場對國際米蘭、祖雲達斯，都保持不失球，成為費倫天拿絕對主力，會方希望提早同佢續約。
此外，費倫天拿中場文拿高拉今季表現大勇，雖然佢司職防守中場，但不時有入波，今季上陣29場有5球進帳，文拿高拉只剩下1年合約，有望獲得續約，至於右後衞當美臣杜度可能續約至2030年。
