東網電視
更多新聞短片
謝利美費林邦(左)助攻力強。(Getty Images)
曼聯名宿史譚近日接受傳媒訪問時，建議紅魔鬼簽入利華古遜翼衞謝利美費林邦，指呢位24歲荷蘭國腳技術全面，速度夠快，非常適合曼聯領隊魯賓艾摩廉嘅戰術體系。
魯賓艾摩廉崇尚352陣式，對於左右翼衞要求非常高，冬季簽入萊切左閘柏德列多古，今夏可能再簽1位右閘，史譚推薦荷蘭同胞謝利美費林邦：「費林邦可以勝任右翼同右後衞，佢速度快，踢法夠直接，既可以自己入波，亦能夠為隊友創造機會，曼聯簽入佢係唔錯選擇，佢好適合現時戰術，唯一問題可能曼聯唔想再收購荷蘭球員。」
前曼聯主帥坦哈格執教期間，曾簽入荷蘭球員，但效果都未如理想，難怪史譚擔心紅魔鬼管理層可能會對荷蘭兵有偏見。
謝利美費林邦今季德甲上陣26場入4球及5次助攻，早前歐國聯8強首回合為荷蘭上陣對西班牙，亦貢獻1次助攻。費林邦現時毀約金為4,000萬歐元(約3.4億港元)，並唔算高，阿仙奴、利物浦、皇馬都有興趣收購佢，曼聯想搶人並唔容易。
