東網電視
更多新聞短片
基連甸斯特頭槌建功。(Getty Images)
歐國聯8強次回合成為入球騷！周一(24日)凌晨4場大戰合共炮製21個入波，其中德國喺半場領先3比0情況下，被意大利追成3比3平手，全靠首回合贏2比1，以總比數5比4躋身準決賽，將同葡萄牙爭決賽權。
德國上半場清風送爽，甘美治30分鐘射入12碼開紀錄，6分鐘後甘美治快開角球畀穆斯亞拿再入1球，加上基連甸斯特完半場前入波，帶住3比0優勢返更衣室。意大利下半場大反擊，摩斯堅恩梅開二度追番2粒，補時5分鐘拉斯柏度尼射入12碼追平3比3，可惜未能收復首回合輸波失地。
德國領隊拿高斯文賽後表示：「上半場係我執教德國以來表現最好嘅45分鐘，控球出色、防守積極，又入咗3球。下半場球員體能下降，我一定要作出調整，被追番2球後心理亦出現問題，回傳太多，呢兩回合賽事入面學到好多嘢，對球隊發展好有幫助。」
