東網電視
更多新聞短片
列斯占士(右)入波後表現平靜，沒有大肆慶祝。(Getty Images)
列斯占士喺世界盃外圍賽射入罰球，兼取得個人首個國家隊入波，但佢卻冇慶祝。根據英國《太陽報》爆料，由於有唔少球迷質疑呢位「玻璃腳」唔應該入選，所以佢入波後作出「無聲抗議」。
列斯占士近3季經常受傷，上季僅為車路士上陣11場，今季亦因為傷患問題，多次延遲復出，導致缺陣頭2個月賽事。不過，踏入2025年後，列斯占士身體狀態有明顯改善，唔只防守稱職，進攻方面亦有建樹，包括1月英超車路士主場對般尼茅夫，佢後備上陣喺補時5分鐘射入罰球，協助車仔逼和2比2，打破超過2年入球荒。
3月初歐協聯車路士作客哥本哈根，列斯占士射入打開紀錄1球，現時更加為英格蘭入波，腳風非常順，成為名副其實嘅「帶刀侍衞」。
賽後列斯占士被問到點解入波後，表現平靜冇大肆慶祝，佢並冇正面回應，只係話：「我估唔到可以入波，但之後睇番重播，呢個罰球門將好難救。」早前有英國輿論認為列斯占士近年太少參加比賽，唔值得入選，全因杜曹教過車路士，而獲得眷顧，經此一役後，相信足以令反對者收聲。
