東網電視
更多新聞短片
查洛保雲(20號)難得可以踢國家隊正選。(Getty Images)
英格蘭今場世盃外以3比0擊敗拉脫維亞，新帥杜曹排出令人「震驚陣容」，11位正選人腳並冇曼聯、曼城、利物浦球員，成為「三獅兵團」自1992年歐國盃後，首次正選陣容冇呢3大豪門球員，被指有意進行大改革「破舊立新」。
英超今場繼續由愛華頓門將比克福特把關，4位正選後衞分別為列斯占士(車路士)、安斯干沙(阿士東維拉)、馬克古希(水晶宮)、利維斯史基利(阿仙奴)，中場有迪格蘭賴斯(阿仙奴)、祖迪比寧咸(皇馬)、摩根羅渣士(阿士東維拉)，雙翼係查洛保雲(韋斯咸)、拉舒福特(阿士東維拉)，前鋒係哈利卡尼(拜仁慕尼黑)。
由於拉舒福特被曼聯外借去阿士東維拉，令英格蘭今場正選球員並冇曼聯、曼城、利物浦球員，對上1次出現呢種情況已經係1992年歐國盃。
事實上，英格蘭今次大軍名單，利物浦只有居迪斯鍾斯、昆沙入選，曼城得菲爾科頓入選，唔計拉舒福特，曼聯更加冇人入選。杜曹領軍之後，英超3大傳統勢力喺「三獅兵團」影響力可能會大受削弱。
