東網電視
更多新聞短片
坦哈格打算去意甲搵食。(Getty Images)
意甲勁旅祖雲達斯早前解僱教練莫達，聘請克羅地亞名宿杜陀領軍至今季結束，根據英國媒體《talkSPORT》爆料，前曼聯領隊坦哈格非常有興趣今夏去祖記「見工」擔任主帥。
杜陀只係簽約到季尾，如果祖雲達斯獲得下季歐聯入場券，有權延長合約多1年，所以祖記下季教練人選仍然存在變數。據悉坦哈格渴望接手執教祖雲達斯，若然呢支老牌勁旅邀請佢領軍，佢一定答應。
呢位55歲荷蘭名帥上年10月被曼聯炒魷後，雖然曾傳出多蒙特、RB萊比錫、阿積士等球隊有意請佢執教，但都冇下文，坦哈格透露今季唔會再教波，似乎想等祖雲達斯開出合約。
不過，意大利傳媒指祖雲達斯有唔少新帥人選，包括文仙尼、加斯柏連尼、皮奧利等，會唔會搵冇意甲教波經驗嘅坦哈格，實屬疑問。
