東網電視
更多新聞短片
傳聞阿諾特夏天將自由身離隊。(Getty Images)
利物浦青訓球星阿歷山大阿諾特，今個夏天約滿回復自由身，歐洲各大傳媒報道，呢位英格蘭國腳已同皇家馬德里簽約，7月正式過檔。消息曝光後，大批利迷反應激烈，批評阿諾特係「反骨仔」，要求領隊施洛將佢「雪」到約滿。
26歲嘅阿諾特係利物浦青訓產品，2016年出道後，「紅軍」將佢栽培成頂尖球星，據報利物浦1月向佢開出新約，甚至應承捧佢做下一任隊長，阿諾特仍無動於衷，而且選擇約滿免費走人，令利物浦收唔到任何轉會費，更加係終極背叛。
有激動球迷表示：「我個人會雪藏佢到完季，唔畀佢參加今季賽事、唔畀佢講再見，甚至唔畀佢做後備、唔畀佢參加英超冠軍慶祝或巡遊，等佢喺屋企睇。」另一球迷Macca亦同意：「唔好畀佢再為利物浦上陣，捧盃嗰陣甚至唔好畀佢入晏菲路！」
球迷對阿諾特非常不滿。
事實上，阿諾特喺歐聯對巴黎聖日耳門一戰足踝受傷，據報可能要抖到4月底，到時英超只剩5月嘅最後4輪賽事，阿諾特會唔會上陣都係未知之數。
