東網電視
更多新聞短片
域陀連迪路夫將於今夏約滿。(Getty Images)
曼聯中堅域陀連迪路夫將於今夏約滿，預料不獲續約，呢位30歲瑞典國腳暗示，可能重返葡超球隊賓菲加，意味有望同另外2位前曼聯球員迪馬利亞、艾華路費南迪斯做隊友。
域陀連迪路夫接受傳媒訪問，提及前度效力球會賓菲加：「賓菲加對我來講，有重要意義，佢哋造就現時嘅我，雖然唔知將來會發生咩事，但賓菲加係我喜歡嘅球隊。」域陀連迪路夫2012年加入賓菲加青年軍，其後獲提升上一隊，2017年夏天被曼聯收購，轉會費達3,500萬歐元(約2.9億港元)。
不過，呢位中堅成「魔」以來，一直未能穩坐正選，近年上陣時間愈來愈少，今季為曼聯各項賽事14次披甲，僅6次擔任正選，加上經常受傷，所以紅魔鬼無意同佢續約。早前傳出AC米蘭打算簽入域陀連迪路夫，但以目前情況睇，佢傾加轉投賓菲加。
另外，周三(26日)凌晨國際熱身賽，域陀連迪路夫以隊長身份協助瑞典以5比1大勝北愛爾蘭，紐卡素前鋒阿歷山大伊沙克繼續有出色表現，射入1球及1次助攻，安東尼艾蘭加亦有1球進帳。
