東網電視
更多新聞短片
洛迪高高斯(左)及安迪歷(右)可能離開皇馬。(Getty Images)
皇馬鋒線人才濟濟，正選位置競爭激烈，2位巴西射手洛迪高高斯、安迪歷為獲得更多上陣時間，萌生離隊念頭。曼城計劃今夏重金收購洛迪高高斯，至於18歲新星可能去德甲搵食。
根據《西班牙6台》爆料，洛迪高高斯嘅爸爸近期前往英國，同曼城管理層見面，討論呢位24歲前鋒入「城」可能性。曼城領隊哥迪奧拿為咗重振球隊，下季捲土重來，準備今夏以1.5億歐元(約12.6億港元)收購洛迪高高斯，薪酬亦比佢現時高，並可以畀佢踢最喜歡嘅左翼位置。
皇馬左翼由雲尼斯奧斯祖利亞佔據，基利安麥巴比亦擅長踢呢個位置，導致洛迪高高斯只能踢右翼或者前鋒，轉投曼城出任左翼，有助佢發揮，的確好有吸引力。
至於上年夏天加盟皇馬嘅安迪歷長居後備，令呢位「新朗拿度」非常沮喪，佢曾經表示擔心缺乏上陣機會，冇得入選巴西隊參加明年世界盃。有傳多蒙特、RB萊比錫有意借用安迪歷，可能係佢拯救足球事業嘅新出路。
