東網電視
更多新聞短片
費查兄弟子承父業。
曾效力曼聯13年嘅蘇格蘭名將費查，可以話係「虎父無犬子」，佢嘅一對「孖仔」目前喺曼聯U21踢到風生水起，近期國際賽更齊齊成為國家隊隊長，但有趣嘅係呢對孖生兄弟選擇代表唔同地方，積克費查代表英格蘭，而泰拿費查就踢蘇格蘭。
費查兄弟喺曼聯U21嶄露頭角，國際賽前最後一場U21聯賽，泰拿費查就兩度助攻積克費查入波，隨後兩人就返國家隊報到。泰拿費查跟爸爸一樣代表蘇格蘭，上周六(22日)以隊長身份帶領蘇格蘭U19對波蘭U19，可惜蘇格蘭以1比4大敗而回。
至於積克費查就選擇代表英格蘭，並喺上周四(20日)出任英格蘭U18隊長，助球隊同捷克U18打成2比2。事實上，兩兄弟喺U16嗰陣曾一齊代表蘇格蘭，但積克之後決定「轉投」英格蘭，因此出現呢個孖生兄弟代表唔同球隊嘅有趣情況。
