東網電視
更多新聞短片
安達斯彭利拿將於明年夏天約滿。(Getty Images)
富咸中場安達斯彭利拿效力呢支倫敦球隊3季以來，有不俗表現，但根據英國媒體《Sportwitness》爆料，呢位29歲巴西國腳拒絕續約，會方為免人財兩失，準備今夏出售佢，巴甲勁旅彭美拉斯有意再次提出收購。
安達斯彭利拿喺曼聯出道後，大部分時間被外借，直至2022年夏天正式離開紅魔鬼，以1,000萬鎊(約1億港元)轉會費加盟富咸。彭利拿將於明年夏天約滿，最新消息指佢唔願意續約，富咸會方已有兩手準備，只要有球會開出「合理」價錢，就會放人。
彭美拉斯早於年初冬季轉會市場，已提出收購安達斯彭利拿，但未能成事，教練列卡度費拉拿當時話，感到非常失望。
彭美拉斯女會長莉娜近期再次表示有興趣簽入安達斯彭利拿，加上富咸已經為出售佢開綠燈，兩間球會有望一拍即合。
值得一提，安達斯彭利拿曾經被曼聯外借去另1支巴甲球隊法林明高，成為奪得2022年南美自由盃及巴西盃冠軍成員，重返巴西搵食，可能更有助佢事業發展。
