東網電視
更多新聞短片
艾斯基柏拉斯奧斯(25號)今場貢獻2次助攻。(Getty Images)
周六(29日)凌晨德甲，利華古遜主場以3比1擊敗波琴，中場艾斯基柏拉斯奧斯貢獻2次助攻，成為贏波大功臣。利華古遜取得聯賽2連勝後，落後踢少1場嘅榜首拜仁慕尼黑3分，保持爭標希望。
利華古遜中場大腦科利安華迪斯養傷之下，艾斯基柏拉斯奧斯肩負組織攻勢重任，呢位26歲阿根廷國腳不負所望，上半場20分鐘橫傳畀阿歷斯加西亞勁射入網打開紀錄。不過，利華古遜防線犯錯，被波琴左後衞柏斯歷克射入扳平。
換邊之後，利華古遜加強攻力，前鋒邦尼菲斯近門撞入，為球隊再次領先。戰至87分鐘，艾斯基柏拉斯奧斯作出美妙直傳，由後備上陣嘅艾米艾里射成3比1完場。
利華古遜近5場聯賽取得4勝1負，呢支衞冕球隊今季德甲只剩下7場聯賽，最後能否反超前拜仁，大家拭目以待。
