東網電視
更多新聞短片
艾達度(右)速度快，個人突破能力強。(Getty Images)
根據「轉會權威」記者羅曼諾(Fabrizio Romano)爆料，曼聯即將同17歲青年軍翼鋒艾達度簽訂1份為期4年嘅職業合約，直至2029年6月。呢位英格蘭U17小國腳獲領隊魯賓艾摩廉提升上一隊操練，有機會入選大軍名單，出戰4月2日凌晨英超作客諾定咸森林。
曼聯體育總監韋確斯親自處理艾達度嘅續約事宜，雙方已經達成協議，短期內就會正式簽約4年，魯賓艾摩廉亦非常欣賞呢位進攻球員，近日將佢提升上一隊操練。擁有非洲安哥拉血統嘅艾達度喺英國出世，並選擇代表英格蘭各級小國腳比賽。
艾達度速度快，個人突破能力強，被指踢法似阿仙奴翼鋒布卡約沙卡，今季為曼聯青年軍上陣13場入7球，潛質非常優厚。艾摩廉近日搵咗幾位青年軍球員參加一隊操練，艾達度最大機會入選比賽名單，甚至可能會上陣對諾定咸森林。
