東網電視
更多新聞短片
素斯連續3輪都做救12碼英雄。(Getty Images)
周日(30日)凌晨英足盃8強，諾定咸森林作客同白禮頓鬥足120分鐘都冇入波，最終喺互射12碼階段，憑門將素斯兩度撲救成功，以4比3贏波晉級，自1991年後首度進軍英足盃4強。
森林喺2月份英超曾7比0炒白禮頓，不過今仗兩隊埋門唔多，下半場森林曾獲得12碼，但被VAR介入後推翻，踢埋加時30分鐘仍互無紀錄，令比賽要互射12碼分勝負。
森林對上兩圈，先後靠互射12碼淘汰埃克塞特同葉士域治，比利時門將素斯都救出關鍵12碼，今場素斯再撲出軒素活同迪亞高高美斯，又一次成為森林晉級英雄。
森林上次贏英足盃冠軍係1959年，對上一次入4強亦要數到1991年，素斯賽後表示：「射12碼係需要運氣，我好開心可以去溫布萊踢4強，對球迷係一大喜率，好高興幫助到球隊。」
