東網電視
更多新聞短片
巴黎聖日耳門有望不敗奪冠。
巴黎聖日耳門(PSG)近期狀態巔峰，周日(30日)凌晨作客6比1大炒聖伊天，依家領先次席摩納哥21分，嚟緊周六(5日)主場對昂熱，只要拎到1分就可以提前封王。
喺歐聯殺入8強嘅PSG繼續大開殺戒，憑干卡路拉莫斯、基華拉斯基利亞、祖奧尼維斯、伊巴謙麥巴耶同迪斯亞杜伊(2球)入波，作客6比1炒聖伊天，今季27場聯賽有22勝5和，有望「不敗奪冠」。
摩納哥同日2比1贏尼斯升上第2位，但仍落後PSG多達21分，喺只剩7輪聯賽之下，PSG下場只需打和昂熱就夠分捧盃，實現法甲「4連霸」。
PSG教練安歷基表示：「我哋已經係冠軍，幾個星期前已經係，我認為PSG由一開頭已經係最佳球隊，依家只係官方作證，之後最重要係保持競爭性，唔好畀水準下跌，目標係贏晒所有冠軍。」
