東網電視
更多新聞短片
基倫耶迪斯窄角度起腳射入。(Getty Images)
1/2
周日(30日)凌晨意甲，祖雲達斯新教練杜陀首仗領軍打響頭炮，主場以1比0擊敗熱拿亞，19歲新星基倫耶迪斯「美斯上身」，個人表演盤球突破，長驅直進窄角度射入，技驚四座，呢位身穿10號球衣嘅土耳其國腳，奠定祖記新一代「金童」地位。
祖雲達斯早前解僱主帥莫達，聘請昔日名宿杜陀接手領軍，對陣式作出調整，由以往「4231」轉成3中堅「3421」踢法，效果立竿見影。
戰至25分鐘出現全場最精彩一幕，基倫耶迪斯離門30幾碼開始盤球突破，連接扭過對手後，喺禁區右路窄角度起腳射入。換邊之後，呢位「新迪比亞路」又展示細膩腳法，擺脫對方2位球員夾擊後傳中，但杜辛華荷域射門軟而無力，浪費入波機會。
祖雲達斯攻勢一浪接一浪，包括中堅皮爾卡魯魯頭槌勁頂，中場文路爾盧卡迪利重炮式遠射，都被熱拿亞門將利亞尼撲出，最終祖雲達斯維持1比0勝果，結束2連敗頹勢。
基倫耶迪斯射入金球，表現大獲好評，賽後佢喺社交網話：「好開心可以喺今場重要勝仗作出貢獻，我哋繼續前進。」至於新帥杜陀表示滿意球隊表現，但指中場古普美拿斯狀態欠佳，恐怕呢位荷蘭國腳隨時正選不保。
另外，祖雲達斯中堅費達歷高加迪今場傷出，可能影響杜陀未來採用3中堅陣式人腳選擇。
基倫耶迪斯表現大獲好評。(Getty Images)
