東網電視
更多新聞短片
貝達(左)肩負阿仙奴重建任務。
阿仙奴體育總監位置「真空」5個月後，周日(30日)正式宣布意大利籍總監貝達上場，呢位前馬德里體育會總監上任後，首要目標係物色一位頂尖前鋒，而士砵亭射手約基利斯據報就係貝達「心頭好」。
貝達之前喺馬體會效力12年，將球隊打造成歐洲頂尖勁旅，貝達簽約阿仙奴後表示：「過去幾年我一直睇住阿仙奴改革，對佢哋再次成為歐洲主要力量嘅努力非常欣賞，球會正處於一個令人興奮嘅時期，好開心可以參與其中，貢獻我嘅力量。」阿仙奴前總監伊度上年11月離隊後，喺冬季轉會窗並冇任何增兵而備受批評。
收購前鋒係阿仙奴夏天重點任務，據《The Athletic》報道，阿仙奴一直視阿歷山大伊沙克為首選，不過亦明白收購難度極高，而另一瑞典前鋒約基利斯就係更現實嘅選擇，消息指貝達對呢位士砵亭非常賞識，貝達上場後，約基利斯將喺阿仙奴收購名單內嘅排名大幅上升。
