東網電視
更多新聞短片
白禮頓又有優質球員出售。(Getty Images)
近年賣球員賺大錢嘅白禮頓，嚟緊又有兩位新星推出市場，分別係祖奧柏度同卡路士巴利巴，兩人各標價1億鎊(約10億港元)，如果順利出售，白禮頓最高可收回2億鎊(約20億港元)！
英國傳媒報道，23歲巴西前鋒祖奧柏度受到利物浦同紐卡素關注，此子白禮頓2023年夏天由屈福特購入，轉會費3,000萬鎊(約3億港元)，兩季以來上陣66場攻入28球，如果成功出售，白禮頓將淨賺7,000萬鎊(約7億港元)。
至於21歲嘅喀麥隆中場卡路士巴利巴，白禮頓同樣於2023年夏天由里爾加盟，轉會費為3,000萬歐元(約2.5億港元)，兩季上陣68場入3球，車路士對呢位中場好有興趣，如果順利以1億鎊出售，白禮頓賺得更多。
白禮頓每隔一段時間就有優質球員推出市場，供應源源不絕，全賴佢哋背後嘅強大球探網，例如今個夏天佢哋將會買入18歲南韓天才翼鋒尹棹泳，幾年之後又可以轉售賺錢，可謂財源滾滾。
