東網電視
更多新聞短片
利安戴納今季英超射入10球及2次助攻。(Getty Images)
曼聯前鋒腳頭無靈，上場英超對諾定咸森林，全場多達24次射門都冇波入，成為紅魔鬼自2003/04年球季之後，最多射門又入唔到波嘅英超作客賽事，今夏簽入射手刻不容緩。根據英國《每日郵報》爆料，曼聯有意用4,000萬鎊(約4億港元)收購護級球隊葉士域治前鋒利安戴納。
一直盛傳曼聯睇中約基利斯等星級前鋒，但由於紅魔鬼近年成績太差，唔少球星對於成「魔」感到疑慮，曼聯惟有向知名度較低球員埋手，最新目標係利安戴納。
呢位22歲英格蘭新星今季為葉士域治踢28場英超射入10球及2次助攻，等於曼聯3位鋒線球員海倫、約舒亞舒克斯、阿歷真度加拿祖入球總和，受到唔少球會關注。
據悉利安戴納合約有4,000萬鎊「降班解約條款」，如果葉士域治降班，其他球會可以用呢個價錢直接買斷佢。葉士域治現時排英超尾三，落後踢多1場嘅尾四狼隊12分，好大機會降班，曼聯可以準備定出手搶購利安戴納。
