東網電視
更多新聞短片
馬加希斯收咧對阿仙奴係致命打擊。(Getty Images)
阿仙奴今季傷患問題不斷，王牌球星布卡約沙卡上場啱啱復出，立即輪到中堅加比爾馬加希斯受傷。阿仙奴周四(3日)證實，馬加希斯大腿肌肉撕裂，今季肯定提早收咧，對將喺歐聯8強面對皇家馬德里嘅「兵工廠」，無疑係極大噩耗。
馬加希斯喺上場聯賽對富咸傷出，檢查後發現大腿肌肉撕裂要做手術，並指治療目標係「準備下個球季展開」，意味今季已經唔使預佢。大腿肌肉傷患成為現代球員最大噩夢，馬加希斯係阿仙奴今季第3個因呢個傷做手術嘅球員，沙卡之前因大腿傷抖咗3個幾月，而夏維斯喺2月做手術後宣告提早收咧。
馬加希斯老婆Figueiredo周三(2日)出席公開活動，已暗示老公傷勢唔簡單：「現實生活就係咁困難，我哋預計唔到呢啲事會發生，唯一可以做嘅係團結去面對，互相畀大家信心，我會陪佢克服呢個難關。」
