東網電視
更多新聞短片
利物浦今季英超第2次輸波。(Getty Images)
等緊捧盃嘅英超「1哥」利物浦，周日(6日)作客富咸意外2比3輸波，不過目前仍然領先次席阿仙奴11分，冠軍仍然「坐定粒六」。今輪英超前列份子齊齊甩轆，前5名球隊全部贏唔到，足證英超各隊實力相當接近。
利物浦今場有好開始，阿歷斯麥亞里士打14分鐘世界波先開紀錄，可惜後防輪流犯錯，被富咸喺短短14分鐘內連轟3球，賴恩施斯隆、伊禾比同洛迪高梅尼斯分別建功。利物浦下半場換入新血後有起色，路易斯迪亞斯72分鐘追番1粒，但為時已晚輸2比3。
利物浦領隊施洛賽後否認球員現疲態：「我唔認為球員疲倦，佢哋有4日時間休息，之前都係咁樣應付，今場我哋所犯嘅錯同疲勞無關。」事實上，阿仙奴日前被愛華頓逼和，利物浦依家仍然領先11分，最後7輪拎12分就足夠捧盃。
除利物浦同阿仙奴失分之外，第3至5位嘅諾定咸森林(輸)、車路士(和)同曼城(和)今輪都贏唔到，阿士東維拉同富咸贏波逼近前4，依家英超第4至第9位只有6分差距，歐聯資格爭逐有排鬥。
