東網電視
更多新聞短片
坦哈格有望去意甲搵食。
周一(7日)凌晨意甲大戰，羅馬主場1比1打和祖雲達斯，喺前4爭該兩敗俱傷。今場焦點人物唔係兩隊球員，而係前曼聯領隊坦哈格，呢位荷蘭教練離奇現身睇波，傳聞有機會成為羅馬新帥，而祖雲達斯亦正物色新教練人選，令坦哈格去意甲落班傳聞炒熱。
近況大勇嘅羅馬今場形勢佔優，但完半場前被文路爾盧卡迪利率先攻陷，半場落後0比1。換邊後4分鐘，後備上陣嘅蘇梅洛度夫閃電為羅馬追平，兩隊之後再冇入波，齊齊失去寶貴2分。
坦哈格今仗到場觀戰，據報係接受羅馬班主邀請，雖然羅馬自雲尼亞里季中執教後成績起飛，不過呢位73歲「老人家」合約只簽到季尾，預料約滿後將放下教鞭，坦哈格成為羅馬目標亦係順理成章。另外，祖雲達斯新帥杜陀亦係到季尾完約，傳聞球會將另覓合適人選，坦哈格都係候選人之一。
