東網電視
更多新聞短片
哥迪奧拿力撐菲爾科頓。(Getty Images)
周日(6日)英超「曼市打吡」球場上一團和氣，最惹火嘅反而係奧脫福球場嘅曼聯粉絲，佢哋喺比賽期間大唱侮辱菲爾科頓嘅歌，甚至侮辱科頓阿媽係「蕩婦」，嬲到曼城領隊哥迪奧拿賽後大爆發。
菲爾科頓今季狀態差勁，今仗演出亦令人失望，莫講話冇入波助攻同冇射門，就連扭波同爭搶數據都係「0」，結果56分鐘就被換走，而佢喺比賽中更被曼聯球迷唱歌針對。
據報奧脫福一個看台上，數百人齊唱：「科頓，你阿媽係個蕩婦。」科頓阿媽Claire Rowlands，前年曾因為喺夜店醉酒鬧事被捕，最後被控公眾地方行為不檢罪成，被法庭罰款處分。
哥迪奧拿賽後憤怒表示：「非常冇品！唔關曼聯事，係嗰班球迷。老實講，我唔明嗰班拖埋科頓阿媽落水嘅人個腦諗乜，呢啲行為極度冇品，佢哋應該覺得羞恥。」
