東網電視
更多新聞短片
伊拉奧拿領軍能力獲得好評。(Getty Images)
般尼茅夫今季喺英超成績理想，西班牙主帥伊拉奧拿嘅執教功力受到肯定，據英國《每日郵報》報道，皇家馬德里已將佢加入新帥候選名單之一，伊拉奧拿下季好大機會執教豪門。
盛傳皇馬教練安察洛堤教埋今季就會離隊，尤其球隊依家喺西甲落後，令「肥安」帥位不穩。沙比阿朗素係繼任大熱門，不過呢位利華古遜教練同樣極度搶手，如果皇馬「如意算盤」打唔響，伊拉奧拿就會成為後備名單熱門人選，而佢同沙比阿朗素係相同經理人公司，皇馬將可以同時展開斟介。
42歲嘅伊拉奧拿喺前年執教般尼茅夫前，曾教過馬德里球會華歷簡奴3季，表現備受好評。伊拉奧拿同般尼茅夫只剩18個月合約，傳聞熱刺亦準備喺夏天撬佢過檔，皇帝女唔憂嫁。
