東網電視
更多新聞短片
尼高奧萊利近9次上陣入4球。(Getty Images)
曼城中場尼高奧萊利踏入2025年後迅速冒起，上場英超對水晶宮又入1球，近9次上陣入4球，根據「轉會權威」記者羅曼諾(Fabrizio Romano)爆料，曼城為免呢位20歲新星重演高爾彭馬轉投車路士，將加快同佢傾續約，留住呢位未來骨幹人物。
車路士曾於今年1月提出收購呢位尼高奧萊利，想將佢打造成「彭馬2.0」，曼城立即拒絕。其後呢位英格蘭小將愈戰愈勇，佢仍有3年合約在身，但周薪僅1.25萬鎊(約12.5萬港元)，「藍月亮」為咗令尼高奧萊利專心為球隊搏殺，準備向佢開出新合約，並加1倍人工至2.5萬鎊(約25萬港元)周薪。
高爾彭馬2年前之所以決定離開曼城，轉投車路士，主要因為上陣機會不足。隨住奇雲迪布尼將於今夏離隊，加上另1位曼城中場菲爾科頓表現走下坡，預料尼高奧萊利可以獲得更多上陣時間，有助會方說服佢續約。
