早已鎖定歐國盃資格嘅英格蘭，周二(21日)凌晨喺C組最後一仗Hea踢風流波，作客只同北馬其頓踢成1比1平手。效力曼城嘅歷高利維斯今場首演表現出色，雖然爭議性被罰12碼，但呢位啱啱19歲生日嘅小將仍獲選今場最佳球員，成為最好生日禮物。<br/><br/>英格蘭今場收起王牌前鋒哈利卡尼，雖然控制局勢但埋門欠奉，上半場只有迪格蘭賴斯遠射中柱最有威脅。41分鐘歷高利維斯跳頂解圍，左手唔小心拍中對方臉部，球證睇VAR後判罰12碼，伊尼斯巴迪希操刀被撲，但佢快步補射入網，北馬其頓半場領先1比0。<br/><br/>58分鐘英格蘭換入哈利卡尼救亡，佢上陣只係1分鐘左右即有貢獻，北馬其頓守將阿坦拿索夫喺哈利卡尼力逼下，將角球頂入自己龍門，英格蘭憑呢個烏龍波追成1比1平手。今場以左閘亮相嘅歷高利維斯，比賽期間內切成為進攻中場表現突出，賽後獲選為今仗最佳球員，領隊修夫基賽後表示：「利維斯踢得好出色，用波非常冷靜，12碼唔係佢嘅錯，佢可以為自己今場表現感到光榮。」