獲減10磅嘅見習騎師黃智弘已回防香港出道，依家喺南澳仍有幾位見習學員學藝，包括兩位女將袁幸堯同埋黃寶妮，佢哋今日喺南澳Port Augusta馬場上陣，呢個馬場比較特別，喺跑泥地，結果袁幸堯大發神威，頭4匹坐騎全勝，分別喺1600米、1100米、1396米同埋1498米4項唔同路程勝出，包括兩匹大熱門，證明呢位女將喺當地頗獲支持。值得一提，袁幸堯上周日同樣於Port Augusta馬場上陣，當日佢梅開二度，換言之兩個賽日贏咗6W，認真犀利。<br/><br/>至於今日有份上陣嘅黃寶妮，成績就冇咁標青，只喺一場1100米泥地賽事取得亞軍，其餘坐騎三甲不入，但其實佢上周日喺Port Augusta馬場一樣有進帳，似乎呢兩位女將喺南澳嘅表現漸入佳境，令人期待。