阿仙奴希望喺今個月內聘請新總監，近日再有眉目，據轉會權威Fabrizio Romano報道，阿仙奴已鎖定1月離開馬德里體育會嘅貝達，而且雙方談判已進入最後階段，有大機會孭起重整阿仙奴嘅重擔。<br/><br/>53歲嘅意大利總監貝達，自2013年開始加入馬體會，由最初擔任球探，慢慢爬上技術總監再到體育總監，今年1月先至解約離開。貝達喺馬體會贏過好多冠軍，轉會市場上亦發掘奧比歷、洛迪卡斯簡迪、基沙文等「筍貨」，喺2019年獲選為歐洲「最佳總監」。<br/><br/>Fabrizio Romano指阿仙奴已同貝達進入最後階段斟介，意大利媒體亦指貝達已拒絕AC米蘭聘約，因為佢已決心加盟阿仙奴。阿仙奴原本總監伊度喺上年11月突然辭職，今個冬天轉會市場並無增兵，導致球隊喺嚴重傷兵下成績大跌，斷送爭標機會。