根據英國《每日郵報》爆料，阿仙奴已經接近同皇家蘇斯達達成協議，將左後衞基蘭泰亞尼外借畀呢支西甲球隊，兵工廠兩閘人腳不足，依家放走埋基蘭泰亞尼，令防線存在隱憂。<br/><br/>現年26歲嘅基蘭泰亞尼2019年由些路迪轉投阿仙奴以來，上陣124場入5球，兵工廠主帥阿迪達一直有意出售呢位蘇格蘭國腳，紐卡素一度準備提出收購，但早前轉為簽入車路士小將賀爾，令交易未能成事。<br/><br/>皇家蘇斯達依家提出以先借後買方式簽基蘭泰亞尼，雖然阿仙奴傾向直接出售佢，但為咗促成轉會，相信仍然會接受皇蘇要求。<br/><br/>阿仙奴今次放走基蘭泰亞尼，引起唔少網民批評，因為右閘祖利安添巴早前受傷長抖，左閘辛真高剛傷愈，狀態成疑，上仗對水晶宮，被逼用中場湯馬士柏迪宮串右閘，富安健洋移去左路，呢位日本國腳發揮受影響，兩黃變一紅被逐，如果冇埋基蘭泰亞尼，兩閘人腳更加捉襟見肘。