阿仙奴喺英超作客1比0赢爱华顿，夏天加盟嘅门将大卫拉耶突然担正，佢亦以“零瑕疵”嘅表现作为回应。领队阿迪达赛后表示，未来会畀大卫拉耶同兰斯达尔轮流上阵，甚至乎会喺比赛中换龙门，同其他位置一样咁看待！<br/><br/>兰斯达尔近年系阿仙奴1号门将，表现亦获得好评，但阿仙奴夏天仍然引入西班牙国脚大卫拉耶。兰斯达尔头4轮把关3胜1和，今场突然改用大卫拉耶，阿迪达解释：“我一直强调每个位置要有2个好球员竞争，当你有两个咁有质素嘅球员，点解唔用？”大卫拉耶今场所受压力唔大，全场只需要作出1次扑救就完成“零封”，但佢帮助后场组织表现突出，全场34次传球有98%成功率，成功破解爱华顿前场逼抢。<br/><br/>门将位置普遍系“不变应万变”，不过阿迪达赛后就有崭新谂法，表明会将门将同其他位置一样咁轮换：“我算系年轻领队，教波只系3年半时间，但已经有唔少遗憾，其中有2次比赛期间，我觉得换龙门会更好，但我冇勇气去做，事后觉得唔开心。其实点解唔可以换呢？当另一个门将都有咁高质素，因应情况换龙门完全冇问题。加比尔捷西斯赢嘅冠军多过我同队中任何人，但佢今场做后备，冇人提出质疑，嚟紧有各项赛事，我要求球员齐心为球队战斗。”