紐卡素今季飽受傷兵困擾，上場聯賽對富咸又有中堅法比安舒哈同中場祖連頓傷出，不過「喜鵲」亦有好消息，荷蘭中堅保治文養傷接近3個月後終於復出，數據顯示有保治文在陣嘅賽事，紐卡素勝率同失球率都大幅改善，成為球隊後防定海神針。<br/><br/>23歲嘅保治文上年夏天由里爾加盟，立即成為球隊主力，係紐卡素上季殺入聯賽前4關鍵人物，可惜今季季初受傷長抖，直到上場先至復出踢最後6分鐘。據《天空體育》數據，紐卡素有保治文嘅46場賽事有55%勝率，平均90分鐘失球只係0.8球，但喺保治文缺陣嘅23場，勝率急跌至43%，而平均90分鐘失球增至1.2球，足證保治文嘅重要性。<br/><br/>紐卡素領隊艾迪侯域對保治文回歸亦非常期待：「保治文係紐卡素非常重要嘅球員，佢落場效果係立竿見影，幾下傳送已證明佢屬於頂級球員，我哋好開心佢終於回歸，希望佢可以一直保持健康。」