內地女星趙麗穎主演嘅內地劇《幸福到萬家》依家正熱播，當中造就多個話題引發網友討論，好似上次婚鬧變性侵嘅劇情，就令到網友正視成日發生嘅低俗婚鬧事件，熱搜題目「#幸福萬家取消婚鬧」仲喺4小時內閱讀及討論次數破1.2億，認真威威。講完貼地社會時事，估唔到劇集內容又有新噱頭，飾演趙麗穎妹妹嘅張可盈，佢劇中男友「大勛」雖然從頭到尾冇露臉，只出現講電話把聲，但佢對女友態度惡劣，加上媽寶又軟弱個性，被觀眾痛批係渣男，仲負評到令「#大勛 渣男」上熱搜。<br/><br/><br/>無端被討論嘅楊冪前男友、內地藝人魏大勛，因為撞名而忽然中箭，佢喺社交網晒出「哎呀，嚇死我了」表情包，以及暈倒嘅Sticker等，流露出哭笑不得嘅無奈。有網友笑言只係巧合，覺得魏大勛太敏感，不過都有粉絲認為撞名實在不妥。對此，《幸福到萬家》編劇則發文：「真是抱歉」並附上2016年創作嘅劇本檔案，疑似否認藉角色嚟炒作，但發文事後已遭刪除。<br/><br/>