周四(2日)凌晨西盃第2圈賽事，基達菲作客第5級聯賽球隊塔迪恩達，輕輕鬆鬆大勝12比0晉級，英格蘭前鋒格連活特亦有2球進帳，有傳佢喺基達菲不斷上升嘅表現，已經獲得西維爾關注。<br/><br/>兩隊實力懸殊，基達菲7分鐘由柏德列打開缺口，格連活特15分鐘再入1球，半場已經領先5比0。格連活特54分鐘同隊友撞牆後抽入死角，大局已定下59分鐘被換離場，不過基達菲仲未收手，最後半個鐘再入多6球，最終大勝12比0。同日西盃仲有另一場「屠殺」，貝迪斯作客以12比1狂數靴蘭哥迪斯。<br/><br/>格連活特今季由曼聯外借基達菲，擺脫家暴官非陰影後愈踢愈好，近4場比賽入咗3球，有傳媒指西維爾對格連活特好有興趣，如果佢繼續進步，西維爾將向曼聯提出收購呢位22歲前鋒。