周四(1日)凌晨西甲，巴塞隆拿主場以1比0擊敗奧沙辛拿，總算及時止血，但亦付出沉重代價，翼鋒費倫托利斯僅上陣7分鐘就受傷退下火線，據悉呢位23歲西班牙國腳需要休息1個月，球隊傷兵增加至9人，加上今個月歐聯重開，巴塞隆拿人腳捉襟見肘，雙線作戰肯定難捱。<br/><br/>費倫托利斯受傷離場時，不禁掩臉落淚，似乎傷勢唔輕，根據西班牙《阿斯報》爆料，呢位翼鋒右腳肌肉撕裂，起碼會缺陣1個月，如果傷及肌腱，可能會休戰更長時間，意味將無緣2月22日凌晨歐聯16強首回合巴塞隆拿作客拿玻里。<br/><br/>除咗費倫托利斯之外，另1位前鋒祖奧菲歷斯日前操練時受傷，加上翼鋒拉芬夏比洛尼、中場加維、沙治羅拔圖、後衞恩尼高馬天尼斯、巴爾迪、馬高斯阿朗素、門將達史特根仍在養傷，巴塞傷兵多達9人。<br/><br/>唯一安慰係新兵洛基費拉拿表現愈來愈好，呢位18歲巴西前鋒今仗後備上陣，射入全場唯一入球，成為贏波功臣，佢踢4場西甲終於開齋。