周三(20日)凌晨歐聯H組，巴塞隆拿主場以5比0大勝安特衛普，創下球隊近6年最大歐聯勝仗，今夏以借用身份由馬體會來投嘅祖奧菲歷斯，今仗演出光芒四射，射入2球及1次助攻，呢位23歲葡萄牙國腳近2仗為巴塞入3球，協助球隊連續2場派5蛋，重拾「地上最強」霸氣，巴塞簽入祖奧菲歷斯，真係執到寶。<br/><br/>開賽11分鐘，祖奧菲歷斯射入打開紀錄，僅過8分鐘佢傳畀羅拔利雲度夫斯基近門射成2比0，呢位35歲波蘭國腳取得職業生涯第100個歐洲賽入波。加上安特衛普右閘巴達利擺烏龍，巴塞上半場領先3球。<br/><br/>換邊之後，加維勁射破網，呢位19歲新星首次喺歐聯入波，戰至66分鐘，祖奧菲歷斯近門頂入成5比0，協助巴塞隆拿自2017年大炒巴黎聖日耳門6比1之後，球隊近6年歐聯最大勝仗。<br/><br/>包括歐國盃外圍賽在內，祖奧菲歷斯已連續3場比賽有波入，共合轟入4球，腳風非常順，呢位「新C朗」近年無論效力馬體會或者被外借去車路士，表現都欠佳，估唔到轉投巴塞之後獲得重生。