繼愛華頓因財政問題被扣10分(上訴後改判扣6分)後，諾定咸森林周一(18日)亦因違反「盈利及可持續發展條例」，被英超賽會罰扣4分，令球隊即時跌落第18位嘅「降班區」。由於愛華頓同森林都會提出上訴，令降班形勢大混亂，甚至可能到收咧都未知邊隊降班！<br/><br/>森林上年承認佢哋嘅財務，比英超定出嘅負債上限超過3,450萬鎊，不過佢哋要求酌情處理，解釋佢哋原本可以喺財政年度內，以3,000萬鎊賣比蘭莊臣去賓福特，但因為希望以更高價錢賣出，最終9月份以4,750萬鎊賣去熱刺，不過仲裁小組未有接納呢個解釋，決定判森林扣減聯賽4分。<br/><br/>森林被扣4分後，依家只得21分被落尾3，原本尾3嘅盧頓(22分)就升上第17位，森林已決定提出上訴。令形勢更複雜嘅係，已被扣6分嘅愛華頓，目前仍孭緊另一項財政違規檢控，有可能再被扣分，如果判刑後愛華頓再上訴，最後判決結果會拖到今季英超煞科之後，意味到英超踢完晒，可能都未知邊幾隊會降班。