葡萄牙喺欧国杯首仗神奇反胜捷克，英雄唔系惯常主角C朗拿度，而系21岁新星法兰斯高干斯卡奥。呢位波图翼锋后备上阵111秒即做英雄，其实佢爸爸沙治奥干斯卡奥亦系葡萄牙一代名将，2000年欧国杯曾协助葡萄牙杀入4强，今次佢可算延续家族荣耀。<br/><br/>喺90分钟仲系1比1嗰阵，葡萄牙一口气换入法兰斯高干斯卡奥等3人，结果法兰斯高干斯卡奥落场111秒就攻入绝杀，成为自2016年欧国杯决赛嘅艾达卢比斯后，首个喺欧国杯后备入波嘅葡萄牙球员，而佢爸爸沙治奥干斯卡奥，更加系葡萄牙“黄金一代”名将。<br/><br/>现年49岁嘅沙治奥干斯卡奥，同费高、雷哥斯达等传奇系同一世代，曾56次代表葡萄牙国家队，代表作就系2000年欧国杯分组赛，对德国连中三元帮葡萄牙赢3比0，当届葡萄牙亦杀入4强。干斯卡奥今场延续爸爸光荣，成为意大利嘅基艾沙父子后，历来第2对喺欧国杯决赛周入过波嘅父子兵。<br/><br/><br/>法兰斯高干斯卡奥喺波图上位，正正系做波图教练嘅爸爸一手提拔，呢位21岁翼锋赛后表示：“我依家无比幸福，代表国家队为全国而战，入波一刻真系超级自豪，我嘅爸爸、妈妈、女友、兄弟姐妹都嚟晒，我想为葡萄牙人带来快乐，特别系我屋企人，佢哋承受咗好多，呢个入波系献畀佢哋。”